Gobernuaren ekimena
berrikutza irekia bultzatzeko
BIND berrikuntza irekiko plataforma ekimen publiko-pribatua da; Eusko Jaurlaritzak eta Industria, Trantsizio Energetiko eta Jasangarritasunaren Sailak sortu dute, SPRI Taldearekin eta haren “Up!Euskadi” plataformarekin batera. 2016an abian jarri zenetik, proiektu pilotu eraldatzaileak egin ditu, eta enpresei laguntza bikaina eman die, Euskadik industriarekin eta berrikuntzarekin duen konpromisoari eutsita.
Mundu osoko startup berritzaileak eta industriako enpresa liderrak konektatzen ditu BINDek, bi aldeentzat probetxugarriak diren lankidetzak sustatzeko. Eusko Jaurlaritzaren eta haren enpresa-garapenerako Spri Taldea agentziaren babesa du. Azken horren tokiko enpresei tresnak ematen dizkie finantzaketarako, industria-gunea lortzeko, teknologia berriak erabiltzeko eta nazioartean hedatzeko.
Hauek dira BIND plataformaren helburuak:
Finantzaketa publikoa eta laguntza-zerbitzuak
BIND plataforman parte hartzen duten startup eta scaleupek prestakuntza, mentoriak, inbertitzaileak eta tokiko gobernuaren laguntza enpresarialik onena jaso ditzakete.
Eusko Jaurlaritzak startupentzat garatutako ekimen ugarietako bat da BIND, talentua, berrikuntza eta eraldaketa digitala sustatzeko eta, hala, ekosistema indartzeko.
Arabako, Bizkaiko eta Gipuzkoako euskal berrikuntza-zentroetako lan-espazioen bidez jarduten du plataformak, eta Haziren eta Gipuzkoako Foru Aldundiaren laguntza ere badu.
Nazioartean aintzatetsitako plataforma
2025ean, Urteko Azelerazioko Ekimen Onena izendatu zuten BIND, El Español erakundeak eta berrikuntza eta ekintzailetzan liderra den Disruptores aldizkariak antolatutako Disruptores Innovation Awards sarietan.
2024an, Startupen Europako 125 Hub Liderren artean 23. postuan geratu zen BIND, Financial Timesek egindako txostenaren arabera. Ikerketan, 2000 programa ebaluatu ziren, eta startup alumniek parte hartu zuten; BINDek aipamen berezia jaso zuen, bere mentoring zerbitzu bikainagatik.
2023an, BIND berrikuntza irekiko plataformak Startup Ecosystem Stars (SES) saria jaso zuen, eskualdeko berrikuntza bultzatzeko eta sektore teknologikoak gobernu-agentzietatik eskalatzeko eredu bikain gisa eratzeagatik. Mind the Gap eta International Chamber of Commercek aurkeztutako SES Awards sariek berrikuntza globalaren norabidea markatzen ari diren praktika eta adibide eredugarriak nabarmentzen dituzte.
2020an, Europako Batzordeak BIND aintzatetsi zuen, eta Enpresa Ingurunea Hobetzeko EEPA Award saria eman zion. Gainera, Gartner nazioarteko aholkularitza-enpresak ekosistema industrialetan berrikuntza sustatzen duten plataforma onenetakotzat jo du BIND.
2017an, Negozio eta Berrikuntza Zentroen Europako Sareak (EBN) irekitako berrikuntza bultzatzeagatik saritu zuten BIND, Enghien-les-Bains en (Frantzia) egin zuen urteko biltzarrean.
BIND berrikuntza irekiko erreferentziazko plataforma gisa finkatu da nazioartean, proiektu disruptiboak garatzeko eta ekosistema ekintzailea indartzeko ahalmena duen plataforma gisa.
Berrikuntza martxan jartzen
Berrikuntza irekia bultzatzea
Nola funtzionatzen du berrikuntza irekiak? BINDen berrikuntza irekiko ereduak startup dinamikoak enpresa lider eta finkatuekin konektatzen ditu, haien eraldaketa digitalerako kanpoko soluzioak eskaintzeko. Win-win ikuspegia du: startupen bizkortasuna eta ezagutza teknologikoa eta finkatutako erakundeen esperientzia eta baliabideak lotzen ditu.
Venture Clients: enpresak dira bezeroak
BINDek Venture Client ereduaren arabera lan egiten du: parte hartzen duten startupek erreferentziazko enpresekin ordaindutako proiektu pilotu bat garatzen dute gutxienez, beren soluzioaren jabetza osoa mantenduta eta equity lagapenik gabe. Eredu horrek aukera ematen die startupei erreferentziako bezeroak dituzten proiektu errealen bidez hazteko, eta enpresek, berriz, teknologia berriak aurkitu, probatu eta abiarazten dituzte beren eraldaketa digitala bultzatzeko.
Abantailak begi-bistakoak dira: enpresen baliabideak eta prozesuak startupen arintasunarekin konbinatzen dira. Oreka hori da BINDen eraginaren eta bultzatzen dituen berrikuntza irekiko proiektuen arrakastaren oinarria.
Prestakuntza, lankidetza eta komunitatea
Startupak laguntza-zerbitzu espezializatuen, negozio-aukeren eta proiektu erreal eta ordainduekiko zuzeneko konexioaren bidez haztea sustatzen du BINDek. Plataformak 100 korporazio, ETE eta sozietate publiko baino gehiago biltzen ditu. Horiek startupekin kolaboratu nahi dute eta beren soluzioak ezartzeko prest daude.
Tailer espezializatuen, prestakuntzaren eta mentoringaren bidez, BINDek startupak nahiz finkatutako enpresak prestatzen ditu lehiakor izateko, berritzeko eta industria-ingurune errealetan modu eraginkorrean lankidetzan aritzeko.
10 urte baino gehiago daramatza mundu osoko startupak euskal enpresa liderrekin konektatzen; BINDek etengabe eboluzionatzen ari den ekosistema bat eraiki du, sinergiak sortu eta benetako eragina duen berrikuntza sustatzen duten startup, erakunde eta inbertitzaileez osatua.
